ڕوونبین

سەرلەبە بەیانی ڕۆژی یەکشەممە ٢٠٢١/١/٢٤ یەکەمین دانیشتن سەبارەت بە داڕشتنی پرۆژەیاسای بوجەی ساڵی ٢٠٢١ گرێدرا. بەپێی ڕاگەیاندنی وەزارەتی دارایی و ئابوریی وەزیری دارایی ئاواتی شێخ جەنابت سەرپەرشتی کۆبوونەوەیەکی کردووە لەگەڵ وەزارەتی سامانە سروشتییەکان بە مەبەستی ئامادەکاری بۆ داڕشتنی پرۆژە یاسای بوجەی ساڵی ٢٠٢١ ی هەرێم . بە پێی راگەیاندنەکەی وەزارەت دانیشتن لەگەڵ سەرجەم وەزارەتەکاندا دەکرێت. وەزارەتی سامانە سروشتییەکان یەکەم وەزارەتە کە دانیشتنیان لەگەڵ کراوە.

لە ڕاگەیاندنەکەی وەزارەتدا هاتووە “یەكەمجارە لە هەرێمی كوردستان داهات و خەرجی و (شایستە دارایی كۆمپانیاكانی نەوت، خەرجی دەرهێنان و هەناردەكردن و فرۆشتنی نەوت)ی وەزارەتی سامانەسروشتییەكان دەخرێتە ناو پرۆژە یاسایی بودجەی هەرێمی كوردستان بۆ ساڵی 2021.” لەساڵی ٢٠١٣ وە هەرێم یاسای بوجەی نییە ئەم هەنگاوەی وەزارەت و حکومەت هەنگاوێکە بە ئاراستەی دروست.

دەقی ڕاگەیەنراوەکەی وەزارەتی دارایی و ئابووری:

یەكەمین كۆبوونەوەی داڕشتنی بودجەی 2021 لە وەزارەتی دارایی بەڕێوەچوو

هەولێر، هەرێمی کورستان، عێراق(GOV.KRD)- پاڵپشت بە بڕیاری ئەنجومەنی وەزیرانی حكومەتی هەرێمی كوردستان، بە مەبەستی ئامادەكردن و داڕشتنی پرۆژە یاسایی بودجەی 2021ی هەرێمی كوردستان، لە چوارچێوەی پلانی وەزارەتی دارایی و ئابوری بۆ ئەم مەبەستە زنجیرەیەك كۆبوونەوە لەگەڵ سەرجەم وەزارەتەكان ئەنجام دەدات.

دەستپێكی ئەم كۆبوونەوانە یەكەم وەزارەت لەگەڵ وەزارەتی سامانە سروشتیەكانی حكومەتی هەرێمی كوردستان، دەستی پێكرد.

سەرلەبەیانی ئەمرۆیەكشەممە 24/1/2021 لە دیوانی وەزارەتی دارایی و ئابوری كۆبوونەوەیەك بە سەرپەرشتی ئاوات جەناب نوری وەزیری دارایی و ئابوری لەگەڵ وەزارەتی سامانەسروشتییەكان بەڕێوەچوو.

بودجەی هەرێمی كوردستان بودجەیەكی گشتگیردەبێت و سەرجەم وەزارەت و دەستەكان داهات و خەرجیی و قەرزە گشتیەكان و كورتهێنان، لە چوارچێوەی پرۆژە یاسای بودجە دەبێت. لەو چوارچێوەیەشدا بۆ یەكەمجارە لە هەرێمی كوردستان داهات و خەرجی و (شایستە دارایی كۆمپانیاكانی نەوت، خەرجی دەرهێنان و هەناردەكردن و فرۆشتنی نەوت)ی وەزارەتی سامانەسروشتییەكان دەخرێتە ناو پرۆژە یاسایی بودجەی هەرێمی كوردستان بۆ ساڵی 2021.