قوباد تاڵەبانی لە یۆنانە وە باسی سەکتەری وزە و کێشەکانی بەغدا دەکات
روونبین
بەپێی راگەیێندراوی سەرۆکایەتیی حکومەتی هەرێمی کوردستان قوباد تاڵەبانی جێگری سەرۆک وەزیران لە پەراوێزی بەشداریکردنی لە کۆڕبەندی نێودەوڵەتی ئابوری دێلفی لە یۆنان لەگەڵ نیکۆس دێندیاس وەزیری دەرەوەی ئەو وڵاتە کۆبووەوە و پێکەوە پرسی وزە و پەرەپێدانی پەیوەندیی ئابوری نێوان دوو وڵاتیان تاوتوێ کرد.
وەزیری دەرەوەی یۆنان لە کۆبوونەوەی لەگەڵ جێگری سەرۆکوەزیرانی هەرێمی کوردستان پێی راگەیاندووە، “کوردستان لەبەردەم دەرفەتێکی مێژووییدایە بۆ هەناردەکردنی نەوت و گاز بۆ ئەوروپا”.
لە تەوەرێکی سەرەکی کۆبوونەوەکەدا کە رۆژی شەمە ٩ی نیسانی ٢٠٢٢ بەڕێوەچوو، باس لە پرسی وزە و پێگەی کوردستان لەڕووی نەوت و گازەوە کرا. لەمبارەیەوە وەزیری دەرەوەی یۆنان ئاماژەی بەوەدا کە کوردستان لەبەردەم دەرفەتێکی مێژووییدایە بۆ هەناردەکردنی نەوت و گاز بۆ ئەوروپا.
هەرلەم چوارچێوەیەدا جێگری سەرۆک وەزیران رایگەیاند راستە دەرفەتی مێژوویی لەبەردەم کوردستاندایە، بەڵام حکومەتی هەرێم و حکومەتی فیدرال سەبارەت بە پرسی هەناردەکردنی نەوت و گاز ناکۆکن.
هەربۆیە پێویستە سەرەتا کێشە یاساییەکانی نێوان حکومەتی هەرێم و حکومەتی فیدرال چارەسەر بکرێن بۆ ئەوەی هەرێمی کوردستان بتوانێت بەبێ کێشە مامەڵە لەگەڵ ئەم پرس و سامانە سروشتییە بکات.
لە تەوەرێکی دیکەی کۆبوونەوەکەدا باسی هاندانی کۆمپانیا و وەبەرهێنەرانی یۆنانی کرا لە هەرێمی کوردستان وەبەرهێنان بکەن و لەمبارەیەوە جێگری سەرۆک وەزیران جەختی کردەوە حکومەتی هەرێم کارئاسانی تەواو دەکات بۆ وەبەرهێنەرانی یۆنانی کە دەیانەوێت لە کەرتەکانی پیشەسازی و کشتوکاڵ و گەشتوگوزاردا وەبەرهێنان بکەن.