روونبین

• هێرشی فڕۆکە بێفڕۆکەوانەکان بەرهەمهێنانی نەوتی کوردستان بۆ نیوە کەمدەکاتەوە

• توندبوونی بازاڕ لە ماوەیەکی نزیکدا بەردەوام دەبێت، کە پاڵپشتی خواستی وەرزی دەکات

ئەمڕۆ هەینی ١٨ ی تەموز  نرخی نەوت بەرزبوونەوەی زیاتری بەخۆیەوە بینی، ئەمەش بەهۆی نیگەرانییەکانی دابینکردنی نەوت دوای هێرشی فڕۆکەی بێفڕۆکەوان بۆ سەر کێڵگە نەوتییەکان لە هەرێمی کوردستان و هەروەها بنەما توندەکانی بازاڕ بەهۆی خواستی بەهێزی وەرزی هاوین.
نرخی نەوتی خاوی برێنت بەڕێژەی 29 سەنت بەرزبووەوە، واتە 0.40% و گەیشتە 69.81 دۆلار بۆ هەر بەرمیلێک، لە کاتێکدا نرخی نەوتی خاوی ئەمریکای ڕۆژئاوای تەکساس (WTI) 27 سەنت بەرزبووەوە، واتە 0.42% و گەیشتە 67.81 دۆلار بۆ هەر بەرمیلێک.

چوار ڕۆژ هێرشی فڕۆکەی بێفڕۆکەوان بۆ سەر کێڵگە نەوتییەکانی کوردستانی عێراق، کە نیوەی بەرهەمی هەرێمی پەکخست، یارمەتیدەر بوو بۆ پاڵپشتیکردنی نرخەکان، بەمەش گرێبەستەکانی ڕۆژی پێنجشەممە یەک دۆلار بەرزبوونەوە.

بەگوێرەی دوو بەرپرسی وزە، بەرهەمهێنانی نەوت لە هەرێمی کوردستان لە دەوروبەری 280 هەزار بەرمیل لە ڕۆژێکدا بۆ نێوان 140 بۆ 150 هەزار بەرمیل لە ڕۆژێکدا کەمکراوەتەوە.

بەرپرسان ئاماژەیان بەوە کردووە کە پێدەچێت میلیشیاکانی سەر بە ئێران بەرپرسیار بن لە هێرشەکانی ئەم هەفتەیەی بۆ سەر کێڵگە نەوتییەکان، هەرچەندە تا ئێستا هیچ گروپێک بەرپرسیارێتی خۆی لە ئەستۆ نەگرتووە.

سەرەڕای هێرشەکە، حکومەتی فیدراڵی عێراق ڕۆژی پێنجشەممە ڕایگەیاند، کەلەگەڵ هەرێمی کوردستان گەشتونەتە رێکەوتن و بڕیارە   دوای دوو ساڵ وەستانی هەناردەکردنی نەوتی کوردستانی عێراق لە ڕێگەی بۆرییەکەیەوە بۆ تورکیا دەستپێبکاتەوە.

جگە لەوەش، خواست لەسەر گەشتە وەرزییەکان یارمەتیدەر بوو بۆ پشتگیریکردنی بازاڕ. بەپێی یاداشتێکی توێژینەوەی شرۆڤەکارانی جی پی مۆرگان، لە دوو هەفتەی یەکەمی مانگی تەمموزدا، خواست لەسەر نەوتی جیهان بە تێکڕا 105.2 ملیۆن بەرمیل لە ڕۆژێکدا بووە، کە بە بەراورد بە ساڵێک پێش ئێستا 600 هەزار بەرمیل لە ڕۆژێکدا زیادیکردووە و تا ڕادەیەکی زۆر هاوتەریبە لەگەڵ پێشبینییەکان.

ئان فام، شرۆڤەکاری LSEG دەڵێت: “نرخی نەوتی خاو لەم هەفتەیەدا تاڕادەیەکی زۆر جێگیر بوو، هیچ جوڵەیەکی بەرچاوی نەبوو، چونکە لەبەرانبەر کاریگەرییەکانی زیادبوونی دابینکردنی ئۆپێک+ زیادبوونی خواستی وەرزی لە ئەمریکا هەبوو”.

داتاکانی حکومەت لە ڕۆژی چوارشەممەدا دەریانخستووە کە کۆگاکانی نەوتی خاو لە ئەمریکا زیاتر لەوەی چاوەڕوان دەکرا لە هەفتەی ڕابردوودا دابەزیوە، بەهۆی بەرزبوونەوەی هەناردەکردن.

هەروەها خواست لە ئاسیا بەهێزتر بوو بەهۆی گەڕانەوەی پاڵاوگەکان بۆ کارکردن دوای چاککردنەوە لە کاتی لوتکەی خواستی وەرزیدا.

شیکارانی کۆمپانیای ING پێشبینی دەکەن بنەماکانی بازاڕی نەوت لە ماوەیەکی نزیکدا پشتگیریان بمێنێتەوە، بازاڕەکە تا ئەم چارەکە بە بەهێزی دەمێنێتەوە پێش ئەوەی دابینکردن لە سێ مانگی کۆتایی ساڵدا باشتر بێت.

بەڵام نادڵنیایی لەسەر سیاسەتی گومرگی ئەمریکا- کە پێشبینی ناکرێ پێش ـ ١ی ئاب چارەسەر بکرێت- قورسایی لەسەر بازاڕ هەیە. هەروەها پلانەکانی بەرهەمهێنەرانی سەرەکی نەوت بۆ نەهێشتنی کەمکردنەوەی بەرهەمهێنان، دابینکردن زیاد دەکات لەگەڵ کاڵبوونەوەی خواستی هاوینە لە نیوەگۆی باکوور. لەم هەفتەیەدا نرخی برێنت و رۆژاوای تەکساسی WTI زیاتر لە 1% دابەزیوە.