روونبین-Roombeen

وەزارەتی نەوتی لە بەیاننامەیەکدا رێکەوتنی دەستپێکردنەوەی هەناردەی نەوتی هەرێمی کوردستانی ڕاگەیاند.

لە بەیاننامەکەدا هاتووە، وەزارەتی نەوت ئەنجامدانی ڕێککەوتنێک ڕادەگەیەنێت بۆ دەستپێکردنی هەناردەکردن و گەیاندنی هەموو نەوتی خاو کە لە کێڵگەکانی هەڵکەوتووی هەرێمی کوردستانەوە بەرهەمدەهێنرێت- جگە لە بڕی تەرخانکراو بۆ بەکارهێنانی ناوخۆیی- بۆ ڕێکخراوی بەبازاڕکردنی نەوتی دەوڵەتی (SOMO). پاشان سۆمۆ لە ڕێگەی بۆری عێراق-تورکیا لە ڕێگەی بەندەری جەیهانی تورکیاوە هەناردەی دەکات، بەپێی ڕێکارە دامەزراوەکان، دەستوور، بڕگەکانی یاسای بودجەی فیدراڵی و بڕیارەکانی دادگای فیدراڵی.

دەقی بەیاننامەکەی وەزارەتی نەوتی عێراق

لە چوارچێوەی پابەندبوونی حکومەتی فیدراڵی بۆ بەڕێوەبردنی سامانی نیشتمانی بە شێوەیەک کە بەرزترین ئاستەکانی شەفافیەت و کارایی بەدەستبهێنێت، وەزارەتی نەوت ئەنجامدانی ڕێککەوتنێک ڕادەگەیەنێت بۆ دەستپێکردنی هەناردەکردن و گەیاندنی هەموو نەوتی خاو کە لە کێڵگەکانی هەڵکەوتووی هەرێمی کوردستانەوە بەرهەمدەهێنرێت- جگە لە بڕی تەرخانکراو بۆ بەکارهێنانی ناوخۆیی- بۆ ڕێکخراوی بەبازاڕکردنی نەوتی دەوڵەتی (SOMO). پاشان سۆمۆ لە ڕێگەی بۆری عێراق-تورکیا لە ڕێگەی بەندەری جەیهانی تورکیاوە هەناردەی دەکات، بەپێی ڕێکارە دامەزراوەکان، دەستوور، بڕگەکانی یاسای بودجەی فیدراڵی و بڕیارەکانی دادگای فیدراڵی.

ئەم ڕێککەوتنە دەرئەنجامی هەوڵە چڕوپڕەکان و گفتوگۆ بەردەوامەکانە لە ماوەی چەند مانگی ڕابردوودا، کە سەرچاوەی گرتووە لە دیدگایەکی هاوبەشی نیشتیمانی بە ئامانجی بەهێزکردنی ڕۆڵی عێراق وەک یاریزانێکی سەرەکی لە بازاڕی وزەی جیهانیدا، پاراستنی سەروەری عێراق و بە توندی بەرگریکردن لە بەرژەوەندییە نیشتمانییەکانی و مافەکانی هەموو عێراقییەکان.

ڕێککەوتنەکە بریتییە لە دانانی میکانیزمی تەکنیکی و ڕێکخستنی ڕوون بۆ دەستەبەرکردنی ڕێڕەوی هەناردەکردن و شەفافیەت لە داهاتی نەوتدا. ئەمەش بەشدار دەبێت لە بەهێزکردنی دارایی گشتی وڵات و زیادکردنی داهاتی بودجەی فیدراڵی. ئەمەش کاریگەری ئەرێنی لەسەر توانای حکومەت دەبێت بۆ جێبەجێکردنی پڕۆژەی خزمەتگوزاری و گەشەپێدان و دابینکردنی بناغەکانی سەقامگیری ئابووری بۆ عێراق و خەڵکەکەی لە باکوورەوە بۆ باشوور و لە  ڕۆژهەڵاتەوە بۆ ڕۆژئاوا.

وەزارەت دووپاتی  پابەندبوونی بێوچانی خۆی دەکاتەوە بۆ بەڕێوەبردنی سەرچاوە نەوتییەکان بەگوێرەی بنەماکانی سەروەری نیشتمانی و بەرژەوەندی باڵای وڵات، دەستەبەرکردنی دابەشکردنی سامانێکی دادپەروەرانە لەنێوان هەموو عێراقییەکاندا، بەگوێرەی دەستوور.

وەزارەتی نەوتی فیدراڵی
کۆماری عێراق
بەغدا – ٢٥ی ئەیلوولی ٢٠٢٥