روونبین-Roombeen

بەپێی زانیارییەکانی روونبین لە  کاتژمێر ١٢ی شەوی ٧/٦ی تشرینی یەکەم لە سەر داوای کۆمپانیای بۆریی کوردستان KPC  ئاستی هەناردەی نەوتی هەرێمی کوردستان بۆ بەندەری جیهانی تورکیا کەم کراوەتە. پێدەچێت هۆکاری کەمکردنەوەکە پەیوەست بێت بە کێشەی تەکنیکیە وە لە بەندەری جەیهانی تورکیا.

هەناردەی نەوتی هەرێمی کوردستان دوای وەستانی لە بەرواری ٢٥ ی ئازاری ٢٠٢٣ دا جارێکی تر لە بەرواری ٢٧ی ئەیلولی ٢٠٢٥دا دوای ٣٠ مانگ دەستی پێکردەوە، ئەمەش پاش ئەوەی بەشێوەیەکی کاتی رێکەوتنی سێ قۆڵی لە نێوان هەولێر ـ بەغدا – کۆمپانیاکانی نەوت ئیمزا کرا.

سەرەتا ئاستی بەرهەم بە ١٥٠ هەزار بەرمیل دەستی پێکرد، پاشتر بۆ ١٩٥ هەزار بەرزبوویەوە.

پاش دەستپێکردنەوەی هەناردەی نەوت، لە بەرواری ٢ی تشرینی یەکەم، یەکەم باری نەوتی هەرێم لە بەندەری جیهانی بارکرا بۆ بازاڕەکانی جیهان و پاشتر لە ٣ی تشرینی یەکەمدا بۆماوەی چەند کاتژمێرێک بەهۆی پڕ بوونی ئەمبارەکانی جەیهانەوە هەناردەی نەوت وەستا.  پێشتریش جارێکی تر لە کۆتا کاتژمێرەکانی ٦ی تشرینی یەکەم بڕی هەناردەی نەوت لەڕێی بۆری نەوتی کوردستانەوە بەڕێژەیەکی بەرچاو کەم کرایەوە کە دەوترێت هۆکارەکەی پەیوەستە بە  بەندەری جیهانەوە.