روونبین

​بەهۆی تێکچوونی بارودۆخی سیاسیی نێودەوڵەتی و داخستنی گەرووی هورمز، دەستەی بەڕێوەبردنی کێڵگەی نەوتی ڕومەیلە لە پارێزگای بەسرە، بڕیاری بەپەلەی دا بۆ کەمکردنەوەی ئاستی بەرهەمهێنان و ناردنی نەوت لە کێڵگەی ڕومەیلەی باشوور.

​بەپێی نووسراوێکی فەرمی کۆمپانیای نەوتی بەسرە کە ئاڕاستەی لایەنە پەیوەندیدارەکان کراوە دەڵێت:   ئەم بڕیارە دوای ئەوە دێت کە داخستنی گەرووی هورمز بووەتە هۆی پەککەوتنی جووڵەی کەشتیوانی نێودەوڵەتی و تانکەرە نەوتییەکان ناتوانن بچنە ناو حەوزی کەنداوەوە. ئەمەش وای کردووە کە لە بەندەرە باشوورییەکانی عێراقدا کەمیی تانکەر بۆ بارکردنی نەوت دروست ببێت.

​لە نامەکەدا دا ئاماژە بەوە کراوە کە بەهۆی ڕاوەستانی بارکردن لە بەشێک لە کۆگاکاندا، ئاستی کۆگاکردنی نەوت لە ئەمبارەکاندا گەیشتووەتە “ئاستێکی مەترسیدار”، هەر بۆیە بڕیار دراوە لە کاتژمێر 15:00ی دوانیوەڕۆی ئەمڕۆ سێشەممە (3ی ئازاری 2026)، ئاستی بەرهەمهێنان و پاڵنانی نەوت بە بڕی 100% کەم بکرێتەوە.

​ئەم پێشهاتە لە کاتێکدایە کە گرژییەکانی ناوچەی کەنداو کاریگەرییەکی ڕاستەوخۆیان لەسەر بازاڕی وزەی جیهانی و هەناردەی نەوتی عێراق دروست کردووە و مەترسیی پەککەوتنی زیاتری کەرتی نەوت لە ناوچەکەدا هەیە.

کێڵگەی ڕومەیلە گەورەترین کێڵگەی نەوتی عێراقە و یەکێکە لە گەورەترین کێڵگە نەوتییەکانی جیهان. لە باشووری عێراق، لە پارێزگای بەسرە هەڵکەوتووە و تا سنووری کوێت درێژ دەبێتەوە.