روونبین -Roonbeen

وەزارەتی سامانە سرووشتییەکان لە ڕاگەیەندراوێکدا ئەمڕۆ ٢٥ی ئەیلولی ٢٠٢٥ ڕایگەیاند “لە ماوەی 48 کاتژمێری داهاتوودا، دەست بە هەناردەكردنەوەی نەوتی هەرێمی کوردستان دەکرێت”

لە راگەیەندراوەکەدا هاتووە کە؛ وەزارەتی سامانە سروشتییەكان و وەزارەتی نەوتی فیدراڵ، پاش ڕێکەوتنی سێقۆڵی نێوان هەردوو وەزارەت و کۆمپانیا بەرهەمهێنەرەکانی نەوتی هەرێم، لەسەر هەناردەکردنی نەوتی هەرێم رێکەوتن.
لە ماوەی ئەم 48 کاتژمێرەدا، دەست بە هەناردەکردنەوەی نەوتی هەرێمی کوردستان دەکرێت.

پێشتریش ئەمڕۆ وەزارەتی نەوتی عێراق و لە بەیاننامەیە کدا و سەرۆک وەزیران محمد شیاع سودانیش رایانگەیاند کە رێکەوتن کراوە بۆ دەستپێکردنەوەی نەوتی هەرێمی کوردستان.

سەبارەت بە هەمان بابەت دوێنێ بە ناوی هەشت کۆمپانیای نەوتی هەرێمی کوردستانەوە راگەیەندراوێک بڵاو کرایەوە کە ٨ کۆمپانیای نەوت کە ٩٠٪ی نەوتی هەرێمیان لە بەردەستە ڕێکەوتنیان لەگەڵ وەزارەتی نەوتی عێراق و سامانە سرووشتیەکانی هەرێم کردووە بۆ دەست پێکردنەوەی هەناردەی نەوت.

هەر دوێنێش وە زیارەتی سامانە سرووشتیەکانی هەرێم لە ڕاگەیەندراوێکدا تردا ڕایگەیاند:

وەزارەتی سامانە سروشتییەکان لە چوارچێوەی راسپاردە و بڕیارەکانی ئەنجومەنی وەزیران، تەواوی پابەندییەکانی خۆی بۆ هەناردەکردنەوەی نەوتی هەرێمی کوردستان لەگەڵ وەزارەتی نەوتی فیدراڵ جێبەجێ کردووە. واژۆی بە سەرجەم کۆمپانیاکانی نێوخۆ و بیانی کردووە، جگە لە یەک کۆمپانیای بیانی تاكوو ئێستا ئەو ڕێککەوتنەی واژوو نەکردووە کە کاریگەریی لەسەر ڕێکەوتنە سێ قۆڵییەکەی نێوان وەزارەتمان و کۆمپانیاکان و وەزارەتی نەوتی فیدراڵ نییە. هەروەها وەڵامی ڕەزامەندییەکانی وەزارەتمان و کۆمپانیاکان لە (٢٣)ی ئەم مانگە بە نووسراوی فەرمی ناردووەتە وەزارەتی نەوتی فیدراڵ، بۆیە چاوەڕوانین وەزارەتی نەوتی فیدراڵ بو ئیمزاکردنی ڕێککەوتنەکە وەڵاممان بداتەوە، تاوەکوو بە زووترین کات کۆمپانیای سۆمۆ دەست بە هەناردەکردنی نەوتی هەرێم بکات و بڕگەکانی ڕێککەوتنەکە جێبەجێ بکات

هەناردەی نەوتی هەرێمی کوردستان دوای بڕیارێکی ژووری بازرگانیی پاریس لە بەرژەوەندی عێراق دژی تورکیا لە ٢٥ی ئازاری ٢٠٢٣ دا ڕاگیرا .