روونبین 

هاوپەیمانی “ئۆپێک پڵەس” ڕەزامەندی دەربڕی لەسەر زیادکردنی بەرهەمهێنانی نەوت بە بڕی ٢٠٦ هەزار بەرمیل لە ڕۆژێکدا، ئەمەش لە مانگی ئایاری داهاتووەوە دەستپێدەکات، لە کاتێکدا ململانێکانی نێوان ئەمریکا و ئیسرائیل دژی ئێران هەڕەشە لە دابینکردنی نەوتی خاو دەکەن.

بەپێی ڕاگەیەندراوێکی ڕێکخراوی وڵاتانی هەناردەکاری نەوت (ئۆپێک)، ئەم بڕیارە لە میانی کۆبوونەوەیەکی ڤێرچواڵی ئەمڕۆی یاریزانە سەرەکییەکانی “ئۆپێک پڵەس” (سعوودیە، ڕووسیا، عێراق، ئیمارات، کوێت، کازاخستان، جەزائیر و عومان) هات بۆ پێداچوونەوە بە بارودۆخی بازاڕە جیهانییەکان و پێشبینییەکانی داهاتوو.

وڵاتانی ئەندام لە هاوپەیمانییەکە جەختیان لە گرنگی زۆری پاراستنی ڕێڕەوە دەریاییە نێودەوڵەتییەکان کردەوە بۆ دڵنیابوون لە بەردەوامی ڕەوتی وزە بەبێ پچڕان.

هەروەها وڵاتانی ئەندام نیگەرانی خۆیان نیشاندا لە هێرشەکان بۆ سەر ژێرخانەکانی وزە و ئاماژەیان بەوە کرد کە نۆژەنکردنەوەی دامەزراوەکانی وزەی زیانلێکەوتوو بۆ گەڕانەوەی تەواوی تواناکەیان، کارێکی تێچووبەرزە و کاتێکی زۆری دەوێت، ئەمەش کاریگەری دەبێت لەسەر بەردەستبوونی دابینکردنی وزە بە گشتی.