روونبین

• کەشتییەکی نەوتهەڵگری “بێترۆناس” بە گەرووی هورمزدا تێدەپەڕێت و بەرەو مالیزیا بەڕێ دەکەوێت
•  ڕێگە بە کەشتییەکە دراوە بە گەرووەکەدا تێپەڕێت و نەوتی خاوی عێراق بۆ پاڵاوگەی “بێترۆناس” لە بێنگرانگ دەگوازێتەوە.
•  کەشتییەکە یەکێکە لەو ٧ کەشتییە مالیزیاوییەی کە بە گەرووەکەدا تێپەڕیون و لە باجی تێپەڕبوونی ئێران بەخشراون.
  
• ویلایەتە یەکگرتووەکان ڕەزامەندی دەربڕیوە لەسەر ڕاگرتنی تەقە لە بەرامبەر دووبارە کردنەوەی گەرووی هورمز لەلایەن ئێرانەوە.

کۆمپانیای زەبەلاحی وزەی مالیزیا “پێترۆلیۆم ناسیۆنال” (بێترۆناس) ڕایگەیاند کە کەشتییەک کە لەلایەن یەکەیەکی سەر بەو کۆمپانیایەوە بەکرێ گیراوە، دوای تێپەڕبوونی بە گەرووی هورمزدا بەرەو پاڵاوگەی کۆمپانیاکە لە “جۆهۆر” بەڕێ کەوتووە.

ئاژانسی بلومبێرگ لە زاری کۆمپانیای نەوتی مالیزیاوە بڵاویکردەوە، کەشتییەکە لەلایەن کۆمپانیای “بێترۆناس”ی مالیزیاوە بەڕێوەدەبرێت و نەوتی خاوی عێراقی هەڵگرتووە و بەرەو پاڵاوگەی بێنگرانگ دەچێت”. ئاماژەی بەوەش کرد کە کەشتییەکە، کە لەلایەن باڵی بازرگانی “بێتکۆ” (Petco) بەکرێ گیراوە، لە ئێستادا لە دەریای عومانە.
ئەم کەشتییە یەکێکە لەو حەوت کەشتییە نەوتهەڵگرەی کە ئێران دوای دانوستان لەگەڵ حکومەتی مالیزیا، ڕێگەی پێداون بە گەرووی هورمزدا تێپەڕن.

کەشتییە نەوتهەڵگرەکە باری باجی تێپەڕبوونی لێوەرناگیرێت

کۆمپانیاکە ئاماژەی بەوە کردووە کە کەشتییەکان ناخرێنە ژێر باری ئەو باجی تێپەڕبوونەی کە ئێران بەسەر ئەو کەشتییانەدا دەیسەپێنێت کە بە ڕێڕەوە دەریاییەکەدا تێدەپەڕن.
گەیشتنی نەوتی خاوی عێراق یارمەتیدەر دەبێت لە پاڵپشتیکردنی دابینکردنی کەرەستەی خاو بۆ کۆمەڵگەی بێنگرانگ، کە یەکێکە لە گەورەترین ناوەندەکانی پاڵاوتن لە مالیزیا.

سەرەتای ئەم هەفتەیە، دوو کەشتیی نەوتهەڵگر کە گازی شلیان (LPG) بۆ هیندستان دەگواستەوە، ڕێگەیان پێدرا بە گەرووەکەدا تێپەڕن دوای ئەوەی ئێران دەستی کرد بە واژۆکردنی ڕێککەوتنی جیاواز بۆ تێپەڕبوون لەگەڵ حکومەتە بیانییەکان.

ڕۆژنامەی “نیو سترەیتس تایمز” بڵاویکردەوە، لە چەند ڕۆژی ڕابردوودا سێ کەشتی کە لەلایەن عومانەوە بەڕێوەدەبرێن لە گەرووەکە دەرچوون، هەروەها کەشتییەکی کۆنتێنەری فەڕەنسی و کەشتییەکی گازی ژاپۆنییش تێپەڕیون.

چین، ڕووسیا، تورکیا و پاکستان لە ڕیزی ئەو وڵاتانەن کە ئێران ڕێگەیان پێ دەدات کەشتییەکانیان لە ڕێگەی گەرووی هورمزەوە تێپەڕن.

کۆمپانیای “ویندوارد” ڕۆژی سێشەممە ڕایگەیاند، لە ٥ی نیساندا کۆی گشتی ١١ کەشتی بە گەرووەکەدا تێپەڕیون، ئەوەش لە ڕێگەی دوو ڕێڕەوەوە؛ یەکێکیان لەژێر کۆنترۆڵی سوپای پاسدارانی ئێراندایە و ئەوی تریان بە درێژایی کەناراوەکانی عومانە، کە هەرچەندە لە کەناراوەکانی ئێران و سوپای پاسداران دوورترە، بەڵام هێشتا ئامانجێکی ئەگەرییە بۆ هێرشەکانی ئێران.

لەم نێوەندەدا، دۆناڵد ترەمپ، سەرۆکی ویلایەتە یەکگرتووەکانی ئەمریکا، ئاگربەستێکی دوو هەفتەیی لەگەڵ ئێران ڕاگەیاند، تەنها چەند کاتژمێرێک پێش ئەو وادەیەی کە دیاریی کردبوو بۆ ئەوەی “دۆزەخ بەسەر ئەو وڵاتەدا ببارێنێت”. ئاگربەستەکە بەستراوەتەوە بە ڕەزامەندی ئێران بۆ ڕاگرتنی ئاستەنگی هاتوچۆی کەشتییە نەوتهەڵگرەکان لە ڕێگەی هورمزەوە.

عەباس عێراقچی، وەزیری دەرەوەی ئێران ڕایگەیاند، ئێران تێپەڕبوونی سەلامەت لە گەرووەکەدا مسۆگەر دەکات.

ئێستا بازاڕەکان لە نزیکەوە چاودێری لێشاوی کەشتییە نەوتهەڵگرەکان دەکەن بۆ ئەوەی بزانن ئایا لەگەڵ جێبەجێکردنی ئاگربەستەکەدا زیادبوونێکی بەرچاو بەدی دەکرێت یان نا.