ڕوونبین

ئەندازیار باسام محەمەد خزر ئەلعەبادی، وەزیری نەوتی عێراق، سەرۆکایەتیی شاندی وڵاتەکەی کرد لە کۆبوونەوەی بەرفراوانی تایبەت بە دەستپێکردنی دانوستانەکان لەسەر ڕێککەوتنی چوارچێوەیی لەگەڵ تورکیا بۆ هاوکاری لە بواری نەوت و گازدا، کە ئەمڕۆ هەینی لە ئەنقەرە بەڕێوەچوو. لە بەرامبەردا، ئاڵپ ئەرسلان بایراکتار، وەزیری وەزەی و سەرچاوە سروشتییەکانی تورکیا سەرۆکایەتیی لایەنی تورکی کرد.

لە کۆبوونەوەکەدا نەخشەڕێگەی پێشنیازکراو بۆ بەهێزکردنی هاوکاریی دووقۆڵی لە پەرەپێدانی ژێرخانی کەرتەکانی نەوت، گاز، پیشەسازیی پترۆکیماوی و بازرگانیی نەوت و گاز و وەزە تاوتوێ کرا، جگه لە بەدواداچوون بۆ ڕێگەکانی پەرەپێدانی چوارچێوەی کارکردن و هەماهەنگیی هاوبەش بە جۆرێک کە خزمەت بە بەرژەوەندییە هاوبەشەکانی هەردوو وڵات بکات.

ئامانج لەم کۆبوونەوە دەستپێکەی دانوستانەکان لەسەر ڕێککەوتنە چوارچێوەییەکەی نێوان کۆماری عێراق و کۆماری تورکیا، دانانی بنەمایەکە بۆ هاوکاریی هاوبەش و فراوانکردنی مەودای هاوبەشی لە کەرتەکانی نەوت، گاز و وەزەدا.

شاندەکەی عێراق پێکهاتبوو لە نەسیر عەزیز جەبار، بریکاری وەزارەت بۆ کاروباری دەرهێنان، لەگەڵ بەڕێوەبەرە گشتییەکانی کۆمپانیاکانی (سۆمۆ، نەوتی باکوور، پڕۆژە نەوتییەکان، و هێڵەکانی بۆڕی نەوت)، سەرەڕای بەڕێوەبەرە گشتییەکانی فەرمانگەکانی ئابووری، یاسایی، و گرێبەست و مۆڵەتە نەوتییەکان.