ماڵپەڕێک بۆ خستنەڕووی داتا و ئاماری کەرتی نەوت و گازی هەرێمی کوردستان دادەمەزرێت

روونبين

وەزارەتی سامانە سروشتییەکان دەڵێت ماڵپەڕێک بۆ خستنەڕووی داتا و ئاماری کەرتی نەوت و گازی هەرێمی کوردستان دادەمەزرێنن. لەکاتێکدا کە لە کابینەی پێشوو وەزارەت پێگەیەکی ئەلەکتروونی هەبوو (ماڵپەڕێک) بەڵام دوا هەواڵ لە و ماڵپەڕەدا بەرواری ٢٠١٨/١١/٤ دا دانراوە، کەلەو ساڵەدا تەنها یەک هەواڵی تێدا بڵاوکراوەتەوە. هەواڵی پێش ئەو زیاتر لە یەکساڵ پێش ئەوە لە ٢٠١٧/١٠/١٧.

هەروەها لەم کابینەیەش وەزارەت ماڵپەڕی هەیە بەڵام زۆر چالاک نییە و زانیاری ئەوتۆی تێدا نییە و هێشتا لیکی گرێبەستەئیمزاکراوەکان چالاک نەکراوە لە کاتێکدا لەماڵپەڕە کۆنەکادا چالاک بوو. یەکەم هەواڵ لە ماڵپەڕە نوێیەکەی وەزارەت لە بەرواری ١٨ کانوونی دووەم ٢٠٢١ دا بڵاوکراوەتەوە ، کۆی ئەو هەواڵانەی تێیدا بڵاوکراوەتەوە لەماوەی ئەم ٢٠ مانگەدا تەنها ١٦ هەواڵی تێدا بڵاوکراوەتەوە، لەوانەش ٣ هەواڵ پێشوازی کونسڵی وڵاتانە، ئەوانی تریش ڕوونکردنە وە و بەیاننامەو و سەرکۆنەکردنە، بەمانایەکی تر زۆر لە ئاستی چاوەڕوانییەکان کەمترە.

ئایا ئەم ماڵپەڕە نوێیە هەر وەکو دەستە خوشکەکانی تری دەبێت یان جیاواز؟! با چاوەڕوانبین.

وێنەی ماڵپەڕی وەزارەتی سامانە سروشتییەکان لە کابینەی پێشوو

کەمال محمد ساڵح وەزیری سامانە سروشتییەکان بە وەکالەت سەرپەرشتیی کۆبوونەوەیەکی فراوانی کرد بە ئامادە بوونی جووتیار عادل بەرپرسی فەرمانگەی میدیا و زانیاری و هیوا ئەفەندی بەرپرسی فەرمانگەی تەکنەلۆجیای زانیاری و بەرپرسانی وەزارەت.

لەو کۆبوونەوەیەدا کتێبێکی دیکۆمێنتاری لەسەر مێژووی نەوتی کوردستان لە سەردەمی عوسمانییەکان خرایەڕوو کەلەلایەن وەزارەتی سامانە سروشتییەکانەوە چاپ کراوە.
هەروەها بڕیار لەسەر دامەزراندنی ماڵپەڕێک بۆ بڵاو کردنەوەی کار و چالاکیی وەزارەت و ئامار و داتاکانی کەرتی نەوت و گازی هەرێم درا، کە ئاسانکاریی بۆ وەبەرهێنانی بیانی و راکێشانی کۆمپانیاکانی بواری نەوت و گاز و شەفافیەتی زیاتری داتاو زانیارییەکان بۆ هەرێمی کوردستان دەکات.

کۆبونەوەی وەزارەتی سامانە سروشتییەکان سەبارەت بە دامەزراندنی ماڵپەڕی وەزارەت